Para aprobar os programas definitivos, a Xunta tivo en conta criterios como que o municipio beneficiario fose resultado dunha agrupación, fusión ou que se tratase dun Concello Emprendedor. Tamén se valorou que os proxectos estivesen relacionados coas TIC e coa economía dixital e que gardasen relación co tecido empresarial do territorio, así como as posibilidades de inserción laboral.

Está previsto que o programa se active ao longo deste mes para o que será necesario levar a cabo unha selección dos participantes a través das oficinas de emprego, nas que se terá en conta a idade, a experiencia laboral previa, a permanencia en situación de desemprego ou o nivel de cualificación. Darase prioridade a aquelas persoas mozas que non recibiran previamente atención por parte do Sistema nacional de garantía xuvenil.

O alumnado obterá formación e disporá dun contrato de traballo. Deste xeito, os programas melloran a empregabilidade á vez que se realizan actuacións de mellora das dotacións públicas e a prestación de servizos no eido local. Os participantes percibirán un salario durante a súa participación na actividade ao longo de 12 meses.