O Grupo Municipal Socialista de Chantada cre que a piques de comezar o curso escolar, a Xunta ten amosado unha clamorosa pasividade. E sinalan que “entendendo que á administración autonómica lle corresponde acometer as medidas máis necesarias, cremos que neste caso se fai preciso unha coordinación dende tódalas administración co ánimo de colaborar no posible.”

Neste senso veñen de presentar unha moción na que instan á Xunta a diminuír as ratios por aula, aumentar o profesorado e extremar os medios de desinfección nos centros. E solicitan ao concello tomar as seguintes medidas:

• Aumentar a vixilancia nas franxas horarias de entrada e saída aos centros e restrinxindo os aparcadoiros durante ese período só con tal fin e evitando deste xeito aglomeracións.
• Dotar unha liña de subvencións de concorrencia competitiva nos vindeiros orzamentos para a adquisición de medios dixitais para uso escolar, coma poden ser ordenadores ou as propias conexións a internet.
• Incrementar os medios destinados á limpeza dos Centros de Educación Infantil e Primaria que se levan a cabo polo Concello de Chantada.
• Convocar unha xuntanza urxente entre representantes do Concello, dos centros e das ANPAS para escoitar as súas demandas e poñerse á súa disposición, facendo realidade tamén a constitución do CONSELLO ESCOLAR MUNICIPAL coa idea de avaliar e facer un seguemento das distintas medidas adoptadas.