Nace no Concello de Quiroga unha Unidade de Atención Temperá, servizo de asistencia á infancia que podería abrir as súas portas a finais deste mes de setembro. Servirá para identificar, previr e actuar sobre os trastornos no desenvolvemento que poidan sufrir os nenos e nenas de 0 a 6 anos de idade.

Será a única de toda a zona sur da provincia e contará cun equipo formado por tres profesionais: un psicólogo, un  logopeda, e un fisioterapeuta, todos eles especializados en desenvolvemento infantil e atención temperá.

Atención temperá

Enténdese a atención temperá como un conxunto de intervencións dirixidas á poboación infantil de 0 a 6 anos, á súa familia e ao seu contorno, e que ten por obxectivo dar resposta o antes posible ás necesidades que presentan os nenos e nenas con trastornos no desenvolvemento ou que poidan estar en risco de padecelos.

O servizo, que funcionará nas instalacións do centro social, partirá da atencion do/a pediatra, quen fará o diagnóstico previo, en función do cal derivará a familia á unidade de atención temperá máis axeitada para o caso. Os centros educativos ou as propias familias tamén poderán solicitar esta asistencia á infancia.

Para poñer en funcionamento este novo servizo público en Quiroga cóntase cunha achega de 12.296 euros da Xunta de Galicia.