O Goberno galego completou un novo envío de 12.500 unidades de protección entre 30 centros das comarcas de Quiroga, Terra de Lemos e Chantada. Preto da metade son institucións orientadas ao coidado de nenos e nenas de 0 a 3 anos, e o resto residencias, vivendas tuteladas e outros servizos para persoas maiores ou con discapacidade. Así, nesta ocasión distribúe 5.600 luvas, 6.600 máscaras e pantallas faciais, e tamén batas, mandís, xel hidroalcólico e garrafas de desinfectante.
Con estas achegas o Goberno galego quere colaborar con todos os centros prestadores de servizos sociais -sexan xestionados por administracións, entidades sociais ou empresas privadas- reforzando a seguridade de traballadores e usuarios. Deste xeito, dende o inicio da crise sanitaria foron subministrados nestas comarcas 271.000 elementos de protección en distintas entregas de periodicidade semanal.
