Este sábado 10 de Outubro conmemórase o Día Mundial da Saúde Mental. O lema é “Saúde Mental e Benestar. Unha prioridade global”, adoptado a nivel estatal, seguindo a temática proposta pola Organización Mundial da Saúde.
Segundo a OMS a saúde mental é unha das áreas máis desatendidas da saúde pública tendo en conta que o acceso a servizos de atención de calidade e gratuítos é moi limitado. Se a isto lle engadimos a situación actual de pandemia a situación agrávase.
Segundo manifesta a Organización Mundial da Saúde: “Xa estamos a ver as consecuencias da pandemia de COVID-19 no benestar mental das persoas, e isto é só o principio. A menos que nos comprometamos seriamente a aumentar o investimento en saúde mental agora mesmo, as consecuencias sanitarias, sociais e económicas terán un gran alcance”. E engaden que “segundo a experiencia adquirida en emerxencias pasadas, espérase que as necesidades de apoio psicosocial e en materia de saúde mental aumentarán considerablemente nos próximos meses e anos” .
Este ano, a asociación monfortina Albores Saúde Mental adaptará a conmemoración do día á situación sanitaria actual e limitará as súas actividades aos medios dixitais e cunha programación que se estenderá ao longo de todo o ano.
Actividades programadas
1. Finalización da exposición fotográfica Fotoxénica-Mente III que se presenta baixo o lema “Conecta coa vida“. Actualmente atópase na primeira pranta do Centro de Saúde de Chantada. Retirarase nas vindeiras semanas polo que aída se pode seguir vendo.
2. Convocatoria do seguinte certame: Fotoxénica-Mente IV co lema “Saúde mental e benestar” do que xa se coñecen as bases e o cartel.
3. Faranse aparicións en medios dixitais e escritos ao longo de todo o ano, que xirarán en torno a temática do lema deste ano.
