Durante a visita aos traballos, José Tomé estivo acompañado pola Deputada de Réxime Interior, Promoción do Territorio e Turismo, Pilar García Porto, o Deputado de Promoción Económica e Social, Pablo Rivera Capón, e o Alcalde do Concello do Saviñao, Juan Carlos Armesto.
José Tomé lembrou que este proxecto, que “dota dun servizo básico a un cento de veciños e veciñas de Marrube”, é froito dun convenio que o propio Presidente asinou co Alcalde do Saviñao a finais do ano pasado no Pazo de San Marcos, a través do que a Deputación aporta os 182.000€ necesarios para acometer as obras da rede de abastecemento de auga. O Concello contratou os traballos e ocupouse das memorias técnicas, de aportar os terreos precisos e das autorizacións pertinentes.
O Presidente da Deputación subliñou que este investimento no Saviñao responde “ao noso compromiso de cooperar cos 67 concellos da provincia, teñan a cor política que teñan, para que poidan prestar servizos públicos de calidade e eficientes aos seus veciños e veciñas, o que favorece o seu benestar e contribúe a fixar poboación no rural”. “Dotar de servizos públicos aos veciños e promover o emprego sostible é a mellor política demográfica”, recalcou José Tomé.
As obras da rede de abastecemento
As actuacións levadas a cabo consistiron en instalar unha rede de abastecemento de auga potable dende a conexión da rede do núcleo urbano de Escairón ata cada un dos núcleos rurais da parroquia de Marrube: A Fonxe, Castiñeiras, A Devesa, Eirexe, Felón, Mendreira, Outeiro, A Penela, Saa, Vigo, Vilameá, Vilar e Vilaseco.
Destaca a instalación dunha tubaxe, de tipo ramificado, de polietileno de alta intensidade de 25 mm de diámetro, e dunha válvula de acometida con tapa de fundición resistente ao paso dos vehículos. Deste xeito, todas as vivendas da zona contan con arqueta, con chave de paso.
