O delegado territorial da Xunta en Lugo, Javier Arias, indicou que o obxectivo destas actuacions é conseguir instalacións “máis confortables e competitivas”, no marco da aposta da Xunta por “fomentar o uso do autobús para a mobilidade interurbana”. O Goberno galego, engadiu Arias, “continúa mellorando as frecuencias, adaptando horarios e modernizando as instalacións, porque entendemos que é unha alternativa necesaria para numerosos veciños e veciñas e aconsellable para o conxunto da poboación, co fin de reducir o tráfico nas estradas”.

Na estación de autobuses de Sarria reformáronse os aseos, reparouse o falso teito, e pintáronse os paramentos tanto exteriores como interiores. Tamén se realizaron traballos na cuberta do edificio e da dársena, cambiáronse carpintarías, mellorouse o muro de peche perimetral e acondicionouse o pavimento adoquinado. Igualmente, acometéronse reformas na instalación eléctrica e nos sumidoiros.

Por último, retirouse a cartelería obsoleta, colocando novos carteis de situación así como pantallas informativas electrónicas que ofrecen información de interese sobre os sevizos de autobús.