O comité clínico aseguraba este mércores, 25 de novembro, que os datos epidemiolóxicos dos últimos días no concello de Monforte eran bos e a tasa de incidencia acumulada de 14 días está por debaixo dos 100. Estes resultados no concello monfortino levan ao comité clínico a insistir en que “cando todo o mundo aporta e se seguen as medidas conséguense resultados e redúcense os contaxios.”

Pola súa banda, o alcalde de Monforte e presidente da Deputación de Lugo, José Tomé, manifestou a súa satisfacción pola decisión do comité clínico para a xestión da pandemia en Galicia de levantar o grao máximo de restricións neste municipio.

Despois de coñecerse a decisión da Consellería de Sanidade, Tomé sinalou que a relaxación das medidas restritivas era unha demanda que solicitaba o concello desde hai días pola evolución epidemiolóxica na localidade. “Era moi necesario e urxente”, afirma o alcalde tras subliñar que “os datos non eran suficientes para manter o peche perimetral e o cerre da hostalería”. “Alegrámonos sobre todo polos hostaleiros, que van poder volver abrir”, apuntou finalmente José Tomé.