O proxecto xa está elaborado e en proceso de licitación por un orzamento que ascende a 542.000€. De feito, hoxe mesmo reúnese a mesa de contratación para seleccionar a empresa adxudicataria das obras, para logo aprobar a adxudicación na Xunta de Goberno.
A actuación consiste na reapertura e limpeza de cunetas, a rehabilitación do firme con aglomerado en quente, e o repintado da sinalización horizontal.
Concretamente, a institución provincial mellorará varios tramos do firme da LU-P-4201, de Pacios a Mosteirovello, dende os puntos quilométricos 0 ao 1,235, do 1,405 ao 1,810, e do 3,435 ao 4,200; da LU-P-4205, de Aldosende por Feasita a Foilebar, dende o 2,331 ao 5,924; e a LU-P-5818, da LU-P-4202 a Vila, dende o 0 ao 6,334. En total, a institución provincial acondicionará un total de 12,3 quilómetros da vía.
Neste senso, o Presidente lembrou que estas actuacións en Paradela súmanse as xa feitas pola institución provincial con outros 105.000€ en 3 quilómetros de dúas estradas, na LU-P-4201, de Pacios a Mosteirovello, e a LU-P-4202, que vai de Pacios por Alosende a Currelos.
Polo tanto, a institución destina 650.000€ á renovación de 15 quilómetros de estradas en Paradela, “o que reafirma o noso compromiso coa mellora das comunicacións viarias para avanzar cara a igualdade territorial e o desenvolvemento do rural, porque axuda a achegar servizos e aumentar a calidade de vida dos veciños e veciñas”, sinalou Tomé Roca.
O Presidente explicou que a prioridade da Deputación é mellorar o firme das estradas provinciais, de máis de 4.200 quilómetros, e, unha vez que estean en bo estado, estudar, en función das particularidades de cada caso, outro tipo de actuacións.
Este compromiso da institución coa mellora da mobilidade reflíctese nos Orzamentos do ano 2021, que suben nun 14% os fondos para a mellora e a conservación de estradas, ata acadar os 16M€. “Trátase dun esforzo moi importante, tendo en conta que a Deputación de Lugo ten a rede de estradas máis extensa de todo o Estado, e tres veces máis que a da Xunta en Lugo”, asegurou.
