O grupo festeiro nacido na Ribeira Sacra, ‘Jinetes del Trópico’, caracterizado pola súa especial reinterpretación do reggaeton, tivo o seu momento de gloria este venres 19 no escenario de Got talent, en Telecinco.
No vídeo previo á actuación, o músico quirogués Fernando Estévez, comentaba “a gaita é o que levo facendo toda a vida e o que levo mamado na casa desde pequeno”, e engadía “creo que a gaita é un instrumento que non se aproveita o que debería en canto a rexistros”.
Deixando constancia, de entrada, da súa identificación coa música tradicional galega tamén recoñeceu que para mantela viva o fin xustifica os medios: “é moi importante manter as tradicións vivas aínda que sexa cambiando cousas”.
ACTUACIÓN
E chegaba o momento da actuación. No escenario estaba só Fernando Estévez. Dani Martínez, o membro do xurado encargado de recibilo, preguntoulle por que se presentaba a Got talent e a súa contestación foi clara, “polas miñas raíces, pola miña terra e porque quero ensinarlle a España a cultura galega”.
Acto seguido, apareceu en escena Antonio García, ‘Tonyto’, e así comezaba a verbena, interpretando a dúas voces ‘Furancho’, un reggaeton moi galego do repertorio do seu grupo ‘Los Jinetes del Trópico’.
Fernando levaba a gaita no ombreiro pero esta tardou en facer acto de presenza. Tanto é así que o propio Dani Martín dubidaba xa que chegase a soar. E si, ao final da actuación, durante uns 15 segundos a gaita tomou o protagonismo. Fernando baixou incluso do escenario para rematar a actuación tocando diante do xurado.
VALORACIÓN
En canto á valoración do xurado, Edurne deu un si recoñecendo que entrou na actuación e que se lle movía o corpo. Risto Mejide, pola contra, deu un non dicindo que “facer un espectáculo verbenesco non lle parecía axeitado”.
Antes de que Dani Martínez puidese desempatar, Tonyto dixo que se pasaban comprometíanse a montar unha ‘súper verbena’ no escenario na vindeira actuación. Martínez, que empatizou moi ben coa proposta escénica desde o primeiro momento, con esta promesa acabouse de convencer e deu o si definitivo.
E xa no vídeo de despedida que se viu para pechar a súa intervención, Fernando e Tonyto dicían a cámara: “somos rapaces de palabra e se volvemos traemos a verbena”.
