O alcalde do Saviñao, Carlos Armesto, deu por “controlado” o brote de covid, que afectou especialmente o colexio, o cal elevou o nivel de restricións no municipio ata o nivel alto.

Armesto destacou que a Semana Santa foi “normal” no municipio, a pesar das limitacións. Sinala que nos últimos días deuse a alta médica a unha profesora e a unha condutora do transporte escolar.

“Estamos a baixar, esperamos que non haxa unha repunta”, remarca. Espera que na reunión do comité clínico deste martes se poida facer unha proposta para “volver a unha relativa normalidade”.

Neste momento son “oito os casos”, explica Armesto. Sinala que “se fixo un cribado ao persoal do sector servizos a semana pasada e saíron todos negativos”.

Apunta que “se fixo o cribado na gardaría tamén, no colexio, ao que se someteu todo o persoal ao completo en canto a condutores, cociñeiras, profesores e alumnos, que é onde se tiña o brote”. Así mesmo fíxose o propio con persoal de hostalaría e comercios, xente que “traballa en atención ao público”, o que “dá tranquilidade de que o brote non teña maior alcance”.

Dos 183 veciños chamados a someterse ás probas PCR, 171 acudiron a ese cribado, que arroxou resultado negativo en todos os casos.