A comisión que se crea cada ano para organizar o evento xa fixou a data para a súa celebración –o vindeiro 30 de maio–, e tamén estableceu os requisitos mínimos que terán que cumprir aqueles olivicultores que queiran presentar o seu aceite na XXI Mostra do Aceite.

Entre o vindeiro luns e o venres 23 de abril –ámbolos dous incluídos– ábrese o prazo para os colleiteiros ecolleiteiras interesados/as en participar na Mostra, que terán que cumprir dúas condicións imprescindibles: contar con rexistro sanitario e ter unha colleita mínima de 200 litros de aceite.

Tendo en conta que o número de colleiteiros/as está limitado a 6, a selección dos e das participantes farase por orde de inscrición nas oficinas municipais por rexistro de entrada. No momento da inscrición os interesados e interesadas deberán presentar unha mostra dun litro en envase de cristal para as posibles catas a realizar.

A XXI Mostra do Aceite celebrarase, evidentemente, respectando todas as medidas sanitarias e as normas anti-covid polo que as actividades que se organicen estarán debidamente estudadas e iranse coñecendo en vindeiras datas.