Segundo refire Santiago Díaz, director deportivo do Club Quixós, esta plataforma sufre un desgaste importante dende hai tempo e deuse parte xa ao Concello de Monforte para que poña solución.
Non chegando esa reparación tan necesaria, estas semanas racharon varias táboas de madeira con algún susto importante para os deportistas. O embarcadoiro ten xa numerosos buracos na súa estrutura principal con base de madeira e supón un risco para os/as piragüistas pero tamén para os acompañantes que axudan aos máis pequenos e pequenas a embarcar e desembarcar.
O perigo de accidente tamén está para moita xente que baixa ao embarcadoiro a darlle de comer ás aves ou simplemente por curiosidade dado que a estrutura é de libre acceso.
Dende o Quixós afirman terlle lembrado novamente o tema ao Concello de Monforte para que actúe con urxencia de cara a evitar males maiores.
