Este programa que impulsa o Concello de Sarria ten como obxectivo facilitar a conciliación familiar ofrecendo un amplo programa de actividades de ocupación do tempo libre adaptadas á Covid-19 e coa cobertura de necesidades materiais e de seguros que procede nestes casos –seguro de accidentes e de responsabilidade civil–.

Entre as actividades que se inclúen están: diferentes deportes –fútbol, fútbol sala, baloncesto, patinaxe, ximnasia, ciclismo–, zumba, actividades acuáticas, pinball, excursións, obradoiros, baile galego, contacontos, cinema… Destacando, ademais, que en todas traballarase o concepto de igualdade e outros valores como a convivencia, a corresponsabilidade ou a resolución de conflitos.

Os destinatarios son aqueles cativos e cativas que naceran entre os anos 2009 e 2017, empadroados e escolarizados no Concello de Sarria. Así mesmo contémplase que o 75% das prazas serán concedidas de forma preferente a familias nas que os dous proxenitores estean en situación laboral activa e a familias monoparentais/monomarentais en situación tamén de actividade laboral. O 25% restante de prazas serán para familias que soliciten entrar no programa ‘por lecer’ entendendo que os/as proxenitores non están en situación activa laboral.

O programa de actividades desenvolverase do 28 de xuño ao 6 de setembro de luns a venres no IES Gregorio Fernández e o prazo para presentar as solicitudes remata o 7 de xuño.

A inscrición poderase facer no CEIP Frei Luís Granada e no enderezo concilia@sarria.es  e o prezo é de 8,86 euros por quincena –días soltos de xuño e setembro tamén ese prezo–.

As bases completas desta convocatoria e o impreso de solicitude están na páxina web do Concello de Sarria.