HomePolíticaPor Chantada presenta unha moción reclamando medidas urxentes de mellora na seguranza...

Por Chantada presenta unha moción reclamando medidas urxentes de mellora na seguranza viaria

A formación considera que a construción e mellora das infraestruturas viarias non pode quedar desligada dun mantemento continuado, sistemático e suficiente. «Non podemos normalizar que haxa estradas nas que circular implique asumir riscos evitábeis por falta de conservación, sinalización ou medidas de protección», sinala o concelleiro Xavier Viana.

Publicado o

POR
Redacción
- Advertisement -

O grupo municipal Por Chantada – Interior Galego Vivo vén de presentar unha moción para reclamar medidas na seguranza viaria das estradas que atravesan o termo municipal. A iniciativa identifica varios puntos especialmente perigosos e denuncia o déficit de mantemento acumulado durante anos nas vías de titularidade das diferentes administracións.

Na CG-2.1, entre a rotonda e a saída de Mundín, advírtese do deterioro dos valados de protección fronte á entrada de animais salvaxes, así como dos problemas ocasionados pola vexetación e pola caída de pólas e árbores. Na LU-533, entre a ponte do Miño e o cruce de Ponte Meixide, tamén se sinala a presenza de árbores nas marxes e o risco que poden supor para a circulación.

Na curva dos Cipreses, na intersección da LU-533 coa antiga LU-617, piden que se avalíe o risco da incorporación dos vehículos procedentes da antiga estrada á LU-533 en dirección a Chantada, nun tramo limitado a 80 km/h e con curvas que reducen a visibilidade.

A moción reclama unha intervención no cruce do Seixo, entre a LU-P-1807 e a LU-P-1805, pola escasa visibilidade para os vehículos que acceden desde esta última vía. A corporación municipal xa aprobara por unanimidade (outubro 2024), a iniciativa de Por Chantada de soliciatar á Deputación a ampliación desta curva no Sangoñedo.

Máis alá destes puntos concretos, a iniciativa propón revisar o estado das barreiras metálicas de seguridade, reparar ou substituír as que estean deterioradas e comprobar a súa adecuación ás recomendacións e normativa vixentes. Tamén reclama un programa de limpeza, mantemento e acondicionamento das gabias, tanto nas estradas provinciais e autonómicas como nas municipais.

A reparación das fochancas é outro dos eixes da moción. Solicita ao Goberno do Estado a reparación integral do firme da N-540 ao seu paso por Chantada, ao considerar insuficientes os traballos realizados nos últimos meses, e reclama tamén que o Concello e a Deputación actúen nas estradas da súa titularidade que presentan deficiencias.

A formación cuestiona, ademais, o emprego de pedrullo para tapar fochancas, como aconteceu recentemente na LU-P-1807. Considera que este tipo de parcheos teñen unha durabilidade moi limitada e poden incrementar a inseguranza viaria, especialmente en estradas con curvas e pendentes polas que circulan vehículos pesados, como camións do leite, da madeira ou carros mesturadores. Por iso, solicita retirar o material que aínda permanece na vía e que a Deputación deixe de empregar este sistema nas estradas provinciais do municipio.

A moción formula quince acordos para que cada administración actúe dentro das súas competencias: a Axencia Galega de Infraestruturas, os servizos provinciais da Xunta, a Deputación de Lugo, o Goberno do Estado e o Concello, «A veciñanza non pode quedar atrapada nunha disputa sobre de quen é cada estrada. O Concello debe exercer tamén un papel activo, reclamando ás administracións titulares as actuacións necesarias e atendendo as deficiencias das vías municipais», defende Xavier Viana.

ÚLTIMAS

Afigal prestará servizos financeiros ás empresas asociadas a Ribeira Sacra Next

Afigal e a Asociación de Empresas Ribeira Sacra Next asinaron un convenio de colaboración...

‘Miconcurso de tapas’, iniciativa dos Lactourus para dinamizar a hostalería de Monforte

A Asociación Micolóxica Os Lactouros organiza os vindeiros mércores 18 e xoves 19 de...

Interrompida a circulación ferroviaria entre Sanclodio-Quiroga e Monforte

Adif vén de comunicar na súa páxina web e nas redes sociais unha interrupción...

FEARS celebra o 12 de decembro en Pantón un foro sobre o futuro da candidatura da Ribeira Sacra a Patrimonio da Humanidade

No encontro reflexionarase colectivamente sobre a candidatura da Ribeira Sacra a Patrimonio Mundial e...