Miguel Ángel iniciaba este luns, 7 de maio, a etapa de Triacastela a Sarria acompañado de Jose María Poveda, neuropsiquiatra de recoñecida traxectoria a nivel internacional. Xuntos compartirán sensacións e emocións, que leven á reflexión e á acción. Unha viaxe motivadora na que o espectador poida atopar algunhas ferramentas, que lle axuden a saír desa “zona de confort” ou de “disconfort” na que nos atopamos en moitos momentos da nosa vida, e da que non sabemos ou non podemos saír.
Nesta etapa, na que decidiron percorrer o tramo que pasa polo Mosteiro de Samos, Jose María compartirá os coñecementos e experiencias adquiridos ao longo da súa carreira profesional. A Humanidade está a vivir a maior crise existencial da época moderna por culpa da Pandemia. “Todo o noso mundo, tal e como o coñeciamos, deuse a volta, modificando pensamentos, condutas… Sen dúbida unha gran traxedia para as persoas que se viron afectadas en primeira persoa, pero sen dúbida unha gran oportunidade para as sociedades, de repensar todo un sistema de valores que nos xeraron progreso, pero tamén moitas desigualdades e inxustizas, e un balance negativo entre “o ser” e “ o ter”, en favor deste último, o que sen dúbida nos xerou como individuos e colectivamente un alto grao de infelicidade e sen carga, que tentamos encher coa acumulación de máis e máis cousas materiais, e repetindo así unha e outra vez o círculo vicioso”, apuntan desde a produtora.
O Camiño de Santiago permítenos e obríganos a desposuírnos do noso personaxe, das nosas posesións, das nosas miserias, do noso acelerado ritmo de vida… e aos poucos ir penetrándonos en sentido profundo e último do camiño. Para esta viaxe do camiño interior contarase con José María Poveda, é coñecida a súa forte vinculación con Oriente onde viaxou co fin de estudar as prácticas de saúde tradicionais e os métodos de asistencia ás enfermidades mentais. Especialmente significativo é o caso de Cambodia, onde desenvolveu proxectos humanitarios de empoderamento dos mestres e sectores vulnerables (nenos e nais) a través dos TIC.
Miguel Ángel Tobías
Os seus proxectos caracterízanse por ter un enfoque social e solidario. Proba diso, algún dos seus últimos traballos como “O guión da túa vida” no que nos mostra que é posible superar a adversidade. Un impulso cinematográfico para achegar esperanza e optimismo no medio desta situación. En “O Secreto de Ibosim”, o reto foi crear a primeira película de cinema sostible e con pegada carbono 0 da historia. O camiño interior é a aposta que este ano a produtora Acca Media decidiu levar a cabo.
