Tal como nos avanzaba días atrás Hernando Caldeiro, o motivo floral para este ano no Corpus Christi era o Ano Santo, co cal decidiron facer unha alfombra coa Cruz de Santiago.
Puxéronse mans á obra o sábado 5 de xuño ás 17:00 h. e remataron ás 24:00 h. Segundo nos conta Caldeiro, un dos deseñadores, “a participación foi boa para facer só unha alfombra pero se houbese que facer todas as que se fan outros anos non sería suficiente”.
Este ano, do mesmo xeito que o pasado, optouse por facer unha alfombra de xeito testemuñal porque as circunstancias non permitían cumprir coa tradición. En condicións normais as alfombras fanse na Rúa Maior, da Igrexa de San Salvador ata a Igrexa de Santa Mariña, uns 200 metros de lonxitude, e a maiores 2 tapices diante de cada unha delas.
O Concello de Sarria convida a ver esta obra de arte mentres sexa posible e felicita a toda a xente que participou de diferentes formas na elaboración do mosaico floral. Así mesmo, lembra que o vindeiro sábado chegarán á vila alfombristas de Ponteareas para facer unha alfombra deseñada “por e para Sarria”.
