Semanas atrás, e coa asistencia de Jose Luis Álvarez, alcalde de Pantón, Luis Guitián, alcalde de Sober e presidente do Consorcio de Turismo da Ribeira Sacra, e Alexandra Seara, xerente deste mesmo organismo, a adega Finca Míllara organizaba un percorrido polas súas instalacións e unha cata.
Na cata de viño interviron Cuco Luna, enólogo residente, e Julio Mourelle, un novo enólogo recén incorporado á adega pantonesa. Este último, que chega avalado pola súa contrastada experiencia e asesoramento en adegas internacionais e nacionais, destacou na súa intervención as características dos caldos de Finca Míllara, a singularidade da adega e a proxección nacional e internacional que lle espera.
O alcalde de Pantón, José Luis Álvarez, afirmou que iniciativas como estas potencian os concellos da Ribeira Sacra e Luis Guitián, alcalde de Sober e presidente do Consorcio de Turismo da Ribeira Sacra, destacou que malia os tempos difíciles que toca vivir, “a forza da natureza desta contorna chea de vida e riqueza imporá un desenvolvemento e crecemento global para toda a Ribeira Sacra”.
MELLORAS E PROXECTOS
Finca Míllara presentaba así a restauración de novos espazos —espazo gourmet— para poñer en valor o marco medioambiental incomparable no que se localiza, na aldea recuperada da Míllara no canón do río Miño, e os excelentes viños que se cultivan neste enclave co viñedo disposto en bancais.
A excelencia e o detalle son dúas razóns de ser da marca, que xa forma parte de ‘Galicia Calidade, e que acadou numerosos premios e unha calificación de 91 puntos na guía Parker. Outra das estratexias a futuro é a expansión nacional e internacional.
