A Plataforma “Eiqui Eólicos Non” segue amosando a súa preocupación pola instalación de varios parques eólicos nos que a comarca do Bierzo e a comarca de Quiroga (entre outras) se ven seriamente ameazadas por proxectos eólicos de diferentes grupos empresariais. “Temos unha especial preocupación polo megaparque denominado “PARQUE EÓLICO BARJAS” (constituído por 22 aeroxeradores de mais de 200 metros de altura) e polo “PARQUE EÓLICO DE BUSMAYOR” (expediente Peol-481), situado a carón do anterior e constituído por 11 aeroxeradores, con muíños de mais de 200 metros.”
Eiquí Eólicos Non considera que o desenvolvemento na zona do turismo verde vaise ver seriamente afectado, xa que os aeroxeradores son absolutamente incompatibles coas actividades económicas derivadas do turismo rural. “Estase a pór en risco un dos motores con máis futuro do noso Concello e mailas súas actividades asociadas, como poden ser o sector do mel ou o agro-gandeiro en xeral. Dos centos de postos de traballo prometidos pola promotora do parque eólico durante a fase de construción, sabemos que van ser ocupados por escasa man de obra local.Os beneficios económicos para a veciñanza van ser case inexistentes,” sinalan.
A plataforma solicita que se inclúa na orden do día do próximo pleno de Folgoso do Courel a discusión sobre a problemática da instalación de parques eólicos no concello e que se recolla en acta un acordo de rexeitamento do Pleno aos diferentes parques eólicos proxectados
Eiquí Eólicos Non fai un chamamento á alcaldesa, Lola Castro, “para que reflexione, para que cavile ao respecto e tome a decisión correcta para o futuro das nosas xentes e da nosa vila: para que loite polo presente e polo futuro do noso Concello.”