A Asociación Veciñal do Saviñao solicita á Deputación o arranxo urxente de dúas estradas

Como obras máis urxentes notifícaselle á Deputación, o “lamentable estado” que presentan na actualidade as estradas 4112 Rendal (Fión, O Saviñao) – O Reguengo (Pantón) e a 5811 Torno – O Gorgozo, presentando un “alarmante deterioro en moitos puntos.”

Casa do Concello. Foto: C. O Saviñao

Na última reunión da xunta directiva da asociación propúxose solicitar un arranxo de emerxencia en dúas estradas de titularidade da Deputación Provincial, recoñecendo que hai outras moitas que tamén o precisan. “O estado de conservación das estradas do concello é lamentable ó longo de todo o territorio municipal. As distintas administración presumen nos medios de comunicación cando arranxan unha estrada da súa titularidade, pero as actuacións son puntuais e escasas, deixando a maigrande parte das vías de comunicación case inservibles e ocasionado averías nos vehículos dos veciños que a diario transitan por elas,” sinalan desde a asociación veciñal do Saviñao.

Os desperfectos das estradas detállanse no escrito da asociación veciñal do seguinte modo: “A estrada 4112 presenta importantes fochancas en tres tramos: entre Rendal e A Barxa, en Galegos e no Reguengo.

A Estrada 5811 concentra gran número de profundas fochancas que fai totalmente imposible a evitación das mesmas. Trátase dunha situación de emerxencia, xa que afecta á comunicación coa zona norte do concello. A zona que precisa atención é un tramo entre o inicio desta estrada 5811 no lugar de Torno e o lugar de Santa Cruz da parroquia de Vilelos, entre os puntos quilométricos 0.400 e 0.800. A asociación veciñal trasmite as queixas veciñais e reclama unha intervención inmediata de rebacheo para facilitar o tránsito e a comunicación. Deberíase executar o afianzamento da base da calzada e a reposición da capa asfáltica xa que todos os anos vemos como se abren fondas fochancas no mesmo tramo.”

DEIXAR UN COMENTARIO

Please enter your comment!
Please enter your name here