Penas do Castelo é un xacemento situado na ladeira do Río Lor na parroquia de Salcedo, A Pobra do Brollón. Trátase dunha fortificación monumental cunha muralla que revelou seis metros de ancho e ata catro de altura conservada tras ser escavada o pasado verán.
Foi aquela a primeira campaña, financiada pola Xunta de Galicia e coa colaboración de Concello, Asociación de Veciños e Comunidade de Montes en base a un modelo de arqueoloxía en comunidade que se está a prodigar no concello guímaro. “Cremos en proxectos que xeran recursos turísticos en comunidade, nacendo de abaixo arriba”, comenta Xosé Lois Maceda, alcalde da Pobra do Brollón.
Desde o primeiro momento unha dúbida sobrevoaba as Penas do Castelo. De que época é? Estamos ante un castro, ou unha fortificación altomedieval…ou outra cousa? Este tipo de preguntas trasldáronse aos máis de 500 curiosos que pasaron polas visitas do verán. “Empregamos un relato baseado na dúbida que funcionou moi ben, non debemos ter medo a dicir que hai cousas que non sabemos. Isto permite ademais achegar ás persoas o proceso de creación de coñecemento” comenta, Xosé Gago, coordinador do proxecto como técnico de Cultura do Concello.
“Trátase dun xacemento estraño, situado en ladeira, cunha muralla cun sistema construtivo orixinal e moi pouca superficie aproveitable no interior” comenta Benito Vilas, arqueólogo director. Ante esta dúbida principal o equipo orientou parte dos esforzos á consecución de mostras que permitisen establecer unha “datación absoluta” mediante probas de Carbono 14. As mostras enviáronse ao laboratorio BETA en Miami e os resultados acaban de chegar para dalos a coñecer este xoves.
