O pasado luns, 17 de xaneiro, publicábanse os datos do padrón respecto ao ano 2021 no INE –Instituto Nacional de Estatística– nos cales, como é habitual, evidénciase a baixada de poboación xeneralizada en todos os concellos da provincia de Lugo, e por ende nos do sur que cubre informativamente Xornal de Lemos.
Pero atopamos dúas excepcións, dentro deste territorio de comarcas –Sarria, Chantada, Lemos e Quiroga–. O Concello de Ribas de Sil, xunto co do Páramo son os únicos que gañaron habitantes o pasado 2021. No caso do Páramo subiu en 3 os empadroados, mentres que Ribas de Sil alcanzou os 15, todo un fito tal e como están as cousas nos concellos pequenos e rurais actualmente.
Se tomamos os datos a nivel provincial, o concello da Comarca de Quiroga, Ribas de Sil, queda no noveno lugar en canto a crecemento de poboación.
Comentamos e felicitamos ao tenente de alcalde do concello, Roberto Castro, quen amosa a súa satisfacción e desexa que esta subida se sosteña ou mellore para este ano. Sinala, ademais, que parte deste crecemento demográfico hai que situalo en dous núcleos rurais, Piñeira e Lousadela, lugares que pasaron de estar deshabitados a gañar poboación.