A institución provincial deu o visto bo este venres ao proxecto e a licitación das obras de rehabilitación da estrada LU-P-1809, que comunica Chantada, Taboada e Antas de Ulla. O orzamento é de 214.000€ para renovar 20 quilómetros desta vía: dende o punto quilométrico 3,6 ao 23,8. O prazo de execución é de tres meses.
A Xunta de Goberno da Deputación de Lugo aprobou en total a mellora de 70 quilómetros de catro estradas que discorren por 9 concellos da provincia cun investimento total que ascende a máis de 850.000€. Inclúense tamén licitacións para a vía que comunica Lugo e Guntín, a que vai de Navia de Suarna a Cervantes e a de Fonsagrada a Ribeira de Piquín.
