Ecoloxistas en Acción Sarria-Monforte comezan afirmando que moi poucas veces fálase do traballo dos axentes forestais e dos riscos que este conleva. Hai uns días, un axente forestal foi agredido cunha forca na cara por un individuo identificado como o causante de provocar un incendio en Oza-Cesuras (A Coruña). Por tal motivo, centos de axentes forestais e ambientais de Galicia concentráronse nos distintos distritos para mostrar a súa repulsa pola agresión sufrida a un dos seus compañeiros o pasado 2 de febreiro e pediron que se poña fin a unha situación que se repite con frecuencia. Precisamente o mesmo día que se producía a agresión en Oza-Cesuras, outro axente acudía ao xulgado de Verín a declarar contra un veciño que tiña unha plantación ilegal de eucaliptos e que o ameazaba de morte.

“Parece ser que cando un axente forestal realiza a tarefa que lle é propia: vixiar e protexer o medio natural e velar polo cumprimento da lei, a súa propia integridade física pode chegar a poñerse en perigo.” sinalan deste o colectivo.

Ecoloxistas en Acción Sarria Monforte quere amosar o seu agradecemento a quen realiza este labor cunha implicación que transcende o meramente profesional. Así mesmo, solicita un apoio claro e contundente por parte da Xunta para estes axentes, xa que se puxo de manifesto que, desgraciadamente, necesitan protección cando realizan o seu traballo.