Zeltia Mateo é unha xoven emprendedora que traballa como peiteadora a domicilio na comarca de Quiroga. Gran parte da súa clientela é xente que vive nas aldeas, tendo que facer moitos quilómetros cada día para poder ofrecerlles os seus servizos nas súas casas.
No mes de xaneiro tivemos a oportunidade de coñecer en profundidade a súa historia, dando a coñecer a súa iniciativa e o labor profesional e social tan importante que fai pola xente que vive no rural. E descubrimos tamén que aínda saca tempo para a súa afección , a maquillaxe de efectos especiais. Os seus traballos triunfan nas redes sociais e soña con traballar como maquilladora en producións cinematográficas.
O caso é que o dixital quincemil.com tamén se interesou pola súa historia semanas atrás, e incluso a TVG convidándoa este pasado venres, 11 de marzo, a asisitir en directo ao programa “Quen anda aí?”, presentado por Roberto Vilar e Rodrigo Vázquez.
No transcurso do magacine puido verse unha reportaxe que lle fixeron en Quiroga, vendo como é un dos seus servizos de perruquería a domicilio; e despois, en directo no plató, Zeltia fixo unha maquillaxe de fantasía en directo a unha veciña súa de Quiroga –Kelly– comentando ademais o seu labor profesional co equipo.
Podedes rescatar o programa na web da TVG, a partir de 2:35 h. de emisión.
