HomesociedadeO primeiro furancho da Ribeira Sacra inaugúrase o 2 de abril en...

O primeiro furancho da Ribeira Sacra inaugúrase o 2 de abril en Trasmonte, Vilachá de Salvadur

O colleiteiro Pedro Pérez González abre un furancho na súa vivenda de Trasmonte, Vilachá de Salvadur, no concello da Pobra do Brollón.

Publicado o

POR
Redacción
- Advertisement -

O Concello da Pobra do Brollón puxo en marcha a posibilidade de abrir furanchos a través dunha ordenanza municipal en vigor dende xaneiro, co obxectivo de ofrecer a viticultores a venda directa do seu excedente. Pedro, de 60 anos de idade, cumpre este perfil de viticultor arribeirado. Criado en Trasmonte na tradición da viticultura do patao, a súa vida profesional tirou por outros carreiros, principalmente a construción, mais sempre mantendo as viñas da casa. Unha actividade non profesional que agora ten a oportunidade de dar uns rendementos económicos, ou cando menos non xerar perdas.

“Non podemos pretender que a ribeira sexa mantida pola paixón de viticultores que traballan a perdas ou malvenden a uva ás adegas,” sinala Xosé Lois Maceda, alcalde da Pobra do Brollón.

Os furanchos son establecementos regulados que ofrecen produtos moi definidos en períodos determinados do ano. A apertura do furancho será en abril ata o final do mes de xuño aínda que “se temos viño abondo poderemos pedir unha prórroga para o mes de xullo,” comenta Pedro Pérez, propietario do furancho.

Os furanchos só poden vender os excedentes de viño e as tapas estipuladas na ordenanza. “O viño que fago para min é o que se vai poñer no furancho,” engade Pedro. En canto ás tapas, destaca a empanada: “Na nosa casa sempre se coceu a empanada no forno de leña. Queremos que quen veña ao furancho goce dese tipo de produto, familiar e tan noso”.

“O viño é Patrimonio e todo o que xera ao seu redor. Podemos ir a un furancho a tomar un viño e escoitar as historias da aldea na que estamos de primeira man… como se fixo sempre,” reflexiona o alcalde. Este primeiro furancho é concibido tamén como un espazo cultural, “A música e a cultura serán importantes neste furancho,” comenta Lucía Pérez, filla de Pedro. “Un espazo comunitario.”

O furancho, que recibirá o nome O Currio por ser o nome da casa na que se sitúa, abrirá na aldea de Trasmonte, na parroquia de Vilachá. A inauguración será o 2 de abril.

ÚLTIMAS

Os deputados do PP denuncian “trato discriminatorio” do Goberno de Sánchez coa veciñanza de Santo Estevo do Sil

Os deputados do PP lucense -Francisco Conde Jaime De Olano e Cristina Abades- trasladan...

Inscricións de novas viñas en suspenso en concellos que non teñan aprobada unha delimitación planimétrica

O pleno do Consello Regulador Ribeira Sacra reuniuse o pasado 10 de febreiro de...

A futura ‘Área Recreativa e Praia Fluvial de Monforte’ terá capacidade para acoller a unhas 20.000 persoas

O alcalde de Monforte de Lemos, José Tomé Roca, informou en rolda de prensa...

Estudantes do IES A Pinguela destacan na fase galega da Olimpiada de Xeoloxía

Corenta alumnas e alumnos de institutos da provincia de Lugo (IES Fontem Albei da...