Unha vez que saíu á información pública a construción dun novo parque eólico no municipio de Paradela, desde a asociación veciñal do Saviñao entenden que afecta á zona norte deste concello, concretamente ós lugares de Valdorraca, Orxaínza, Agra e Souceda.

A asociación considera excesiva a proliferación destas infraestruturas, polo que asume as alegacións propostas pola plataforma rural Interior Galego Vivo, á que están adheridos.

Na data do 4 de maio rexistraron ditas alegacións no portelo único do Concello dirixidas á Vicepresidencia Segunda e Consellería de Economía, Empresa e Innovación, para que sexan tidas en conta tanto no estudo de impacto ambiental como no proxecto sectorial.