Os concellos de Bóveda e O Incio acordaron a súa agrupación voluntaria para soster en común o posto de secretario-interventor municipal, que cobre persoal funcionario da Administración local con habilitación de carácter nacional.
Segundo recolle o Diario Oficial de Galicia (DOG), o expediente seguiu os trámites pertinentes ata a súa elevación á Xunta, que autoriza este tipo de agrupacións voluntarias, a cal debe elevarse a Consello, como ocorreu neste caso na sesión do 5 de maio.
O DOG tamén publica a cobertura deste posto, provisto por concurso, e que conta cun complemento específico de 43.101,95 euros (14 pagas anuais).
O caso de Bóveda e O Incio non é o único que se repite entre os concellos galegos. Así, o pasado 21 de setembro de 2021, os Concellos de Abegondo, Bergondo e Carral tamén se aliaron para soster en común o posto de traballo de tesouraría, neste caso cun complemento específico de 14.025 euros (14 pagas anuais).
