Quiroga contra Movistar

O alcalde de Quiroga, Julio Álvarez, amosa o seu malestar contra a empresa de telefonía móbil Movistar, polo "nefasto servizo" que vén ofrecendo nos últimos meses. Asegura que, mínimo unha vez á semana non hai rede móbil, "é algo que non se pode consentir, facernos sentir como en tempos de posguerra”.

Casa Consistorial Quiroga / Concello de Quiroga

Julio Álvarez considera que non se pode permitir que esta operadora tivese ao municipio durante case 24 horas sen servizo. Durante esta xornada, os servizos básicos do municipio, bancos, servizos de urxencias, administracións, farmacias e empresas particulares, foron privados a desenvolver as súas actividades.

O rexedor local anunciou que tomará todas as medidas legais oportunas contra esta compañía por este “nefasto servizo” e anima aos usuarios a facer denuncia conxunta contra a compañía Movistar e buscar outras alternativas, cambiando o contrato a outras compañías.

Julio Álvarez afirma que “é inconcibible que despois de tanto tempo unha das compañías de telefonía máis importantes do país non sexa capaz de solucionar os seus problemas de cobertura e que a veciñanza teña que sufrir continuamente cortes nun servizo que paga.”

O rexedor local convida á veciñanza deste municipio e á dos concellos limítrofes a participar nunha concentración o próximo luns, día 20, as 13:15 horas diante da casa do Concello de Quiroga para amosar o desacordo con Movistar.

DEIXAR UN COMENTARIO

Please enter your comment!
Please enter your name here