Como cada ano, a Asociación Boca do Monte dos Anguieiros presenta unha programación humilde pero moi variada para celebrar a Festa da Madalena, patroa do lugar.
Co obxectivo tamén de dinamizar a aldea e a súa contorna convidan á xente a participar en diferentes actividades. Este ano, entre as novidades que ofrecen, están a proxección dun documental e a celebración da X Edición do seu tradicional campionato de Bolos Celtas.
SÁBADO 23
Ás 9:00 h. Camiñada Anguieiros-Vilanuide-Anguieiros
Trátase dunha andaina circular duns 9 quilómetros na que se camiñará por sendeiros que servían para comunicarse entre aldeas, no caso concreto entre Os Anguieiros e Vilanuide, e na que se aproveitará para coñecer o inmenso patrimonio aurífero e xeolóxico que se concentra na zona. A xoia da coroa nesta sesión deportiva e divulgativa será Montefurado, o túnel romano coñecido na contorna como a Boca do Monte. O arqueólogo Iván Merayo, de Coureleando, será o guía especializado que documente aos presentes durante a camiñada.
De 19:00 a 20:00 h. haberá xogos tradicionais e infantís para a cativada. Xogarase, entre outros xogos, á chave, á billarda, aos bolos celtas, a tirar da corda por equipos, etc.
Ás 20:30 h. a asociación organizadora convida a unha merenda con petiscos de balde. No bar da organicación haberá auga, refrescos e viño.
A continuación, entre as 21:30 e as 22:30 h. chega o primeiro pase da foliada a cargo do grupo tradicional de Quiroga O Recanto, grupo que volverá tocar entre as 23:30 e as 00:30 h. tras un descanso no que se proxectará un documental relacionado coa contorna.
DOMINGO 24
Entre as 10:00 e as 12:00 h. terá lugar o ‘X Campionato de Bolos Celtas’ con premios para as 4 primeiras e os 4 primeiros clasificadas/os. Unha edición moi importante para a entidade organizadora que leva once anos recuperando este xogo tradicional. Comezaban no 2012 e só tiveron que suspender o campionado no 2020 por mor da pandemia.
Ás 12:30 h. haberá un pasarrúas a cargo da formación de música tradicional da Asoc. Abertal da Rúa e ás 13:00 h. Misa e procesión.
A continuación aperitivo popular e sorteo de rifas con acompañamento musical de Abertal.
