A través da iniciativa Gabinete de apoio á muller coidadora, a Asociación de familiares de enfermos de Alzhéimer de Chantada (AFA) ofrece a estas persoas que, tal e como destacou López Abella, “habitualmente fan renuncias vitais e profesionais importantes para poñerse á fronte dos coidados”, orientación, atención psicolóxica, de mediación familiar e actividades para favorecer a súa empregabilidade e orientación laboral. Estas medidas, tal e como subliñou a secretaria xeral da Igualdade, resultan fundamentais para unha activación persoal e social das mulleres afectadas.

O 17% dos fogares da comarca chantadina contan polo menos cunha persoa dependente e máis do 80% das coidadoras principais son mulleres –esposas, fillas, irmás, noras– tal e como ten constatado AFA. “O labor que desempeñan ten un custe económico, pola merma de ingresos no momento de asumiren os coidados, pero tamén da saúde física e psicolóxica”, remarcou López Abella.

O 17% dos fogares da comarca chantadina contan polo menos cunha persoa dependente e máis do 80% das coidadoras principais son mulleres

A Xunta achegou 23.600 euros para o desenvolvemento do programa, no marco dos apoios que cada ano convoca para que entidades de iniciativa social sen ánimo de lucro desenvolvan iniciativas dirixidas a mulleres en situación de especial vulnerabilidade.

As coidadoras insírense neste programa ao ter que padecer moitas veces sobrecarga que pode afectar ao seu rendemento e xerar inestabilidade laboral. Non podemos esquecer que estas mulleres compaxinan en moitos casos a asunción dos coidados de fillas e fillos e tarefas de ámbito doméstico coa atención das persoas enfermas ao seu cargo nos seus postos de traballo.

Na súa visita, a secretaria xeral da Igualdade estivo acompañada do Alcalde de Chantada, Manuel Lorenzo Varela.