SAF Chantada presenta o 4 de outubro a nova sección sindical da CGT

A cita será ás 11:00 no Casino de Chantada para presentar a nova sección sindical CGT- Chantada do SAF. Participarán representantes provinciais da CGT e representantes das traballadoras do Servizo de Atención no Fogar (S.A.F.).

SAF Chantada folga (arquivo) / En Marea

Desde o SAF informan de que as traballadoras déronse de baixa do sindicato CIG por considerarse “abandonadas” e consideran que a CIG estaba en conivencia coa empresa SAMAIN (CLECE).

Lembran que ante as folgas e manifestacións iniciadas a finais do 2019, e pese a decisión maioritaria tomada en asemblea en favor da súa continuidade, a delegada sindical abandona as concentracións por non estar conforme coas mesmas, “coa conseguinte pasividade do sindicato. Decisión que toma a delegada trala xuntanza persoal que manivo co alcalde da vila. Preguntámonos a cambio de que”, sinalan desde o SAF.

Consideran que a delegada sindical non cumpriu co seu cometido e o sindicato defendíaa. Nos casos das traballadoras despedidas lamentan a confusión e entorpecemento de ter presentando unha demanda colectiva que agora deixa pendentes de sentenza as demandas particulares presentadas. “Tras estes despidos, as traballadoras chamamos á mobilización e manifestámonos en Chantada e en Ourense con compañeiras de toda Galicia. Unha vez máis a CIG non estivo e abandonou ás traballadoras”, engaden.

Como última oportunidade, a organización SAF Chantada enviou ó sindicato CIG un correo coa petición de ter unha asemblea nun prazo de 15 días. Aseguran que non recibiron resposta e decidiron dirixirse con estes feitos á CGT, “que está con nós, que nos deu todo o seu apoio, que xuntouse con nós sempre que o pedimos, e que claramente non están da man de ningún cacique nin partido caciquil, nin de ningunha empresa privada.”

As convocantes pídenlle a todas as traballadoras do servizo de atención no fogar de Chantada que se sumen a esta iniciativa para defender os seus intereses. Engaden, “A maior parte dos ingresos vanse en transporte pola carestía dos combustibles e así non podemos seguir. Seguimos a traballar sen medios, tendo que levantar dependentes con moitos quilos de peso”.


DEIXAR UN COMENTARIO

Please enter your comment!
Please enter your name here