A área da praia da Cova convertiuse nos últimos anos nun dos puntos máis visitados do territorio Ribeira Sacra “o que trouxo consigo a masificación e o conseguinte colapso circulatorio dadas as características das estradas ribeireñas que configuran a paisaxe en todo o conxunto da Ribeira Sacra”, aseguran desde a asociación.
Consideran que agora é o momento de propoñer alternativas para “salvar esta singular área dunha morte de éxito. Coñecida a posta en marcha polo Consorcio de Turismo da Ribeira Sacra da plataforma de participación cidadá, Participa Ribeira Sacra, consideramos oportuno dirixirnos á entidade do Consorcio de Turismo da Ribeira Sacra para que se tomen medidas co tempo suficiente e coa finalidade de conseguir unha mobilidade sostible e dar solución dunha vez por todas a esta problemática que ameaza ó noso vulnerable territorio”. Tamén insisten en ter presentado estas iniciativas ata en catro ocasións no concello, sen ter tidas en conta.
A Asociación Veciñal do Saviñao propón:
- Microbús lanzadeira. A saída debería facerse dende Fión, na bocaribeira, xa que a maior parte dos visitantes da praia proceden de fóra do Saviñao e non chegan a pasar sequera por Escairón, punto de partida ata agora. Para elo habería que habilitar un prado como espazo de aparcamento dende o que partiría dito microbus. Poderíase valorar un segundo servizo de microbús con punto de partida dende Belesar.
- Circulación unidirecional do tráfico dende o desvio á Arxuá, pouco antes da igrexa románica da Cova, permitindo ó tránsito bidirectional aos propietarios de terras na ribeira, coa conseguinte sinalización. A baixada faríase pola igrexa da Cova e a subida por Soutomango e Arxuá. Quedaría un curto espazo bidirecional duns 400 metros onde se xuntan as dúas estradas e onde poderían colocarse uns semáforos.
- Sinalización da prohibición da circulación de vehículos superiores a 6 metros de lonxitude, dadas as pechadas curvas existentes para advertir da imposibilidade de acceso dos grandes autobuses.
- Sinalización do ancho da estrada para evitar a baixada dos grandes vehículos.
- Ubicación de paneis dixitais nas zonas de estacionamento e saída dos microbuses, en Fión e Belesar, que avisen da ocupación total co coche.
- Evitar a toda costa a modificación da paisaxe, renegando de toda idea de ampliar o ancho da estrada coa apertura de chamativos e aparatosos noiros.
Segundo a asociación veciñal estas medidas teñen a intención de conseguir un turismo de calidade e sostible, compatible coa delicada orografía e paisaxe da Ribeira Sacra.