A aldea de Vieiros, na que viven dúas familias con nenas/os, foi noticia estes días pola chegada da neve pero tamén porque o temporal deixounos sen luz e un desprendemento de terra cortou a estrada DP-50-01. Tal foi a magnitude do mesmo que ademais de atrancar a estrada arrastrou o vehículo dunha das familias do lugar ata o río Selmo. Os feitos aconteceron o luns 16 de xaneiro.
Actualmente viven dúas familias con nenos/as e unha delas, ao verse afectada a súa propia vivenda no desprendemento, tivo que baixar a Quiroga e aloxarse na casa duns amigos provisionalmente.
A outra familia permanece en Vieiros, co coche no río, rodeados de neve pero, por sorte, xa coa estrada accesible e con luz dende o mércores 18 de xaneiro. Preguntado a este veciño comenta que por sorte xa se restableceu o subministro de luz e que este mesmo mércores pasaron pola tarde as máquinas quitaneves.
DESPRENDEMENTO DE TERRA
O desprendemento foi de grandes dimensións tapando totalmente a estrada DP-50-01 de pedras, terra e árbores que arrastrou ao seu paso. Tal foi a violencia do mesmo que guindou o vehículo que estaba estacionado nunha das beiras bastantes metros abaixo ata o río.
Como queira que a Deputación de Lugo ten a titularidade desta vía, o servizo de mantemento fixo os traballos de limpeza pertinentes para desbloquear o paso da estrada dirección Seoane, xa no Concello de Folgoso do Courel. Onte, mércores 18, estaba xa expedita para o paso de vehículos. Agora queda por resolver quen se fai cargo dos danos e prexuízos causados tendo en conta que o sinistro afectou a unha propiedade privada –a un muro de contención próximo a unha vivenda e quizais aos alicerces da mesma–, a un vehículo e a terreos que quedaron enterrados polo propio desprendemento.
