Os responsables de Kern Pharma fixeron repaso da situación do proxecto e analizáronse os detalles construtivos sobre o propio terreo onde se situará a planta, así como tramitacións pendentes de tipo administrativo para facilitar a fluidez das actuacións e que poidan ser unha realidade o antes posible.
O pasado día 28 de febreiro entrou por rexistro do Concello a solicitude de Kern Pharma para a licenza de obras. O Concello deulle prioridade absoluta e en menos de un mes, concedeulle a licenza solicitada. Para elo a administración local tivo que elaborar os informes técnicos pertinentes e solicitar da Deputación de Lugo informes do servizo de Vías e Obras, en relación coa afección que puidera ter esta industria, que se instalará no lateral da estrada provincial LU-P-3205 de Monforte de Lemos a Sober, por Neiras.
Finalmente a Xunta Local de Goberno, aprobou conceder a licenza de obras de construción da nova planta nos terreos situados no Polígono Industrial do Reboredo, parcelas 1C, 2C, 3C. A memoria valorada da nova Planta de Inxectables e o proxecto de obra afecta á 1º Fase de construción da planta e ascende a 31.193.572 €. Nesta primeira fase crearanse uns 50 postos de traballo.
O ICIO que lle corresponde a esta inversión ascende a 623.781,44€, como Monforte é Concello Emprendedor bonificarase a licenza nun importe de 592.592,36 € polo que a empresa Kern Pharma terá que pagar pola licenza de obra 31.189,07€ O concello tamén vai bonificar durante 3 anos o 95% da IAE e o 95% do IBI para facilitar a implantación de novas industrias e a ampliación das existentes ligadas á creación de emprego.
José Tomé, agradeceu a Raúl Diaz-Varela a súa colaboración e o seu interés por crear esta nova planta de inxectables na terra natal de seu pai e creador do grupo INDUKERN, “Cando nos próximos meses Kern Pharma inicie as obras de construción da nova Planta de Inxectables, producirase un antes e un despois no tecido industrial de Monforte que afectará a toda a comarca e que vai contribuir ó crecemento do tecido industrial do Polígono que vai ter que ser ampliado a curto plazo pola demanda que xa está tendo de novas empresas e a ampliación das que xa están instaladas.”
Neste sentido o Concello, xa ten contratado coa empresa “Oficina de Planeamento”, un plan parcial de modificación das normas subsidiarias de planeamento para ampliar o terreo industrial situado na marxe esquerda da nova Rúa que se construíu recentemente no Polígono xunto á gasolineira e ó mesmo tempo, están tramitando con SEA outra ampliación na zona suroeste do Reboredo.
