A feira destinaba a programación da primeira xornada á viticultura heroica con conferencias sobre o tema e a participación de viños canarios que tamén forman parte do CERVIM catalogados como viticultura heroica, ao igual que a DO Ribeira Sacra.
Nesta xornada contouse con cata dos viños canarios e un Túnel do Viño no que participaron as adegas: El Lomo (D.O. Illas Canarias), Comarcal de Güimar (D.O. Güimar) e Domínguez Cuarta Generación (D.O. Tacoronte-Acentejo), Atrium Vitis, EDV 2015, Fructuoso-Hobbs, Lar de Ricobao, Terrazas de Outeiro e Val de Quiroga como adegas do municipio e Alma de Donas, Algueira, Ponte da Boga, Adega Gullufre e Rectoral de Amandi, da D.O. Ribeira Sacra e Adega Corisca da D.O. Rías Baixas.
Xa durante a fin de semana os viños que se poderían catar nos diferentes postos foron os das adegas nomeadas da D.O. Ribeira Sacra e da adega convidada da D.O. Rías Baixas. A climatoloxía acompañou para que centos de persoas se achegaran tanto o sábado como o domingo a Quiroga. A Feira inaugurábase o sábado pola mañá contando cos conselleiros de Presidencia e Medio Rural, Diego Calvo e José González, e Julio Álvarez, alcalde de Quiroga. O pregoeiro da cita foi o presentandor, Carlos Sobera, que ás 20.30 do sábado eloxiou ante un auditorio repleto, os viños, o val de Quiroga e a gastronomía e a paisaxe da Ribeira Sacra, que aproveitou para coñecer durante a súa visita.
Despois da cita en Quiroga, quedan dúas citas coas Feiras do Viño na Ribeira Sacra, a de Pantón e a de Monforte de Lemos. Este ano contarase ademais con citas vinculadas ao viño no Saviñao, despois de comezar o pasado ano e estréase o concello de Taboada.
