O 23 de abril celebrábase en Monforte a VIII Festa de Clásicos, un encontro organizado polo coñecido Club Autoclásico Ribeira Sacra. Nesta edición participaron 15 clubes, cuns 150 coches inscritos e uns 318 participantes contando tamén a convidados.
O día estivo pasado por auga pero non foi atranco algún para que a explanada da Compañía lucise cos coches de época que chegaron ata este enclave monfortino. Ademais dos vehículos participantes estiveron presentes José Tomé, presidente da Deputación de Lugo e alcalde de Monforte de Lemos; Luís Guitián, presidente do Consorcio de Turismo da Ribeira Sacra e alcalde de Sober; e a homenaxeada, Elvira Veloso, secretaria de dirección en SEAT e impulsora da colección ‘Seat Históricos’, nave A 122 e futuro museo.
O roteiro previsto transcorreu con todal normalidade, circulando os coches por paraxes de gran beleza entre viñedos e miradoiros espectaculares como o do Duque. Tamén foi de gran interese a parada na Adega Cruceiro de Vilachá de Doade.
No que respecta a curiosidades salientar que o coche máis antigo desta edición foi un ‘Morris Minor do 1953’ de Estefan G. E. de Monforte de Lemos, e que o participante que chegaba de máis lonxe foi Amador Carqueijeda. Este último viña de Barcelona facendo o Camiño de Santiago nun Seat 600 acompañado da súa dona.
Dende a organización agradecen a presenza das autoridades, o apoio de patrocinadores e prensa, e a implicación de todas e todos os participantes que malia o mal tempo achegáronse a Monforte para esta na VIII Festa de Clásicos.
Dende Xornal de Lemos agradecemos tamén a colaboración de Miguel Martínez, un dos organizadores e membro do Club Autoclásico Ribeira Sacra pola información facilitada.
