Coller un local de hostalería na pandemia e saír adiante ten moito mérito, mérito que se explica dende a esperanza, a ilusión e o traballo. Un exemplo témolo en Monforte de Lemos, na zona de terrazas da Compañía, e chámase Bar Jardín34. Esther colleu o bar no 2020 e aguantou malia as dificultades para saír adiante e dicir hoxe que “a verdade é que estamos traballando ben, foi moi difícil na pandemia pero agora imos ben”.
Para celebrar os tres anos que leva na xerencia do local convida á clientela a un monólogo, programado para este venres 2 de xuño ás 21:00 h., e a continuación ofrecerá degustación de empanadas a conta da casa con ambientación musical na que haberá selección dos mellores temas dos 80 e 90.
XAN VEIGA, HUMORISTA
Monólogo “Made in Galicia” no que nos embarcaremos nunha viaxe ao pasado para lembrar as desventuras dun galego calquera, unha especie de Balbino actualizado.
Xan Veiga tráenos á memoria un bo feixe de costumes, ditos, xogos, cantigas e outras lerias que nos farán matinar no moito que cambiaron as cousas dende aquela… do moito que cambiaron ou non.
Este humorista de Arzúa estivo no Luar da TVG máis de sete anos contando contos e chistes co cal a experiencia no mundo da narración oral e os recursos para facer rir non lle faltan. Dende hai uns anos arrimoulle experiencias e anécdotas á súa vivencia persoal e creou este texto que resulta unha simpática e retranqueira volta aos 80.
