Os Gin Toni’s chegan este sábado 10 de xuño ao Parque de Can Mercader, en Cornellà de Llobregat, para actuar nas festas que organiza a Asociación Cultural Galega Rosalía de Castro. A actuación está programada para as 24:00 h. como broche final a unha tarde na que actuará a orquestra Costa Dorada e haberá Fogos Artificiais, un espectáculo digno de ver, máis se cabe no marco incomparable que representa este fermoso espazo verde da cidade catalá.
Segundo puido saber este medio falando con Andrés Montes, vocalista da banda, a actuación xurdiu a través de Óliver Fernández, presidente da entidade galega organizadora. “Ten familia no Saviñao e viunos en Escairón. A partir de aquí plantexounos a posibilidade de ir actuar alí”, comenta. E engade que “realmente este concerto estaba posto para o ano da pandemia e foise pospoñendo ata que por fin este ano imos poder facelo”.
Esta coñecida banda, que versiona os clásicos do pop e o rock oitenteiro español, está celebrando actualmente os dez anos enriba dos escenarios coa xira “Diez años organizando”.
