CSIF denuncia que desde o día 5 de abril deste ano as dúas hematólogas están de baixa, sendo cubertas por unha doutora que vén dous días á semana de Lugo. Lembran que cando unha das especialistas quedou embaraza, “a xerencia substituíuna por un facultativo eventual a tempo completo, que se incorporou antes mesmo de que a médica fixese efectiva a súa baixa, chegando a estar tres persoas no servizo.”

Considera o sindicato que este feito demostra que “se existe vontade é posible dar cobertura con facultativos de presenza física a tempo completo”. Sen embargo, agora a xerencia comunicou que unicamente haberá un reforzo que se desprazaría desde Lugo dúas veces por semana. CSIF lamenta este cambio de criterio por parte da dirección do Hospital e advirte de que implica a máis colectivos que traballan en estreita relación co de hematoloxía, como o dos técnicos de laboratorio.

Alertan desde CSIF que “debido á falta de especialistas, estes profesionais teñen que asumir funcións de validación propias dun facultativo e nos casos de especial complexidade, os resultados demóranse xa que hai que chamar a Lugo ou no seu caso enviar a proba a Lugo, co consecuente prexuízo para o paciente.”