O Concello de Bóveda pon en marcha a 2ª edición do “Fentos Festa” o vindeiro 29 de xullo. Trátase dunha mostra na que participarán formacións de diferentes estilos musicais tendo como escenario a Praza da Filgueira en horario de tarde-noite. A participación local estará representada por unha charanga e unha coral.
“A iniciativa naceu o ano pasado e o resultado foi moi satisfactorio”, apunta o alcalde, José Manuel Arias, quen explica que nesta segunda edición, “a mostra inclúe a actuación dunha charanga, unha banda, un grupo de música e danza tradicional e unha coral, entre outros”.
PROGRAMA
A festa arrinca ás 18:30 horas coa actuación da Charanga de Bóveda. Ás 19:00 horas actuará o grupo de música e danza tradicional Meigas e Trasgos de Sarria. Ás 20:00 horas será a quenda da Banda de Música Sons e Soños de Rábade, Outeiro e Begonte. Ás 21:15 horas volverá actuar Meigas e Trasgos de Sarria.
De seguido, ás 22:00 horas actuará a Coral Municipal de Bóveda e para rematar o festival ás 23:30 h. subirá ao escenario o grupo monfortino Doc Magoo’s, unha banda que versiona clásicos do rock de todos os tempos.
Todas as actuacións serán de balde, convidando dende o concello a achegarse a vivir unha xornada diferente de música para todos os públicos e gustos.
O evento conta coa colaboración da Vicepresidencia da Deputación de Lugo a través do programa Tradigalu e do Consorcio de Turismo da Ribeira Sacra.
