No programa de actividades inclúense 8 obradoiros abertos e gratuítos para o público adulto e infantil que terán lugar no Centro Cultural Fondo de Vila e na Fundación Uxío Novoneyra, así como 12 cursos de iniciación en diferentes oficios que contan xa con todas as prazas cubertas. O obxectivo destas actividades é tratar de divulgar os oficios artesanais e todos os valores que implica o feito á man para que futuros consumidores entendan o valor engadido da artesanía e mesmo futuros profesionais do sector vexan a artesanía como un modo de vida.
Durante cinco días, os visitantes que se acheguen ata Folgoso do Courel poderán participar nos talleres gratuítos e abertos que se estarán a desenvolver no Centro Sociocultural Fondo de Vila (Folgoso), en horario de 10:30 a 13:30 horas e de 16:00 a 18:00 horas e na sede da Fundación Uxío Novoneyra (Parada), en horario de 11:00 a 13:30 e de 16:00 a 18:00 horas.
No Centro Cultural Fondo de Vila celebraranse os talleres de cerámica e de estampaxe. Os artesáns vigueses Carlos San Claudio e Nerea Carpente, de Peixe Nero, serán os encargados de impartir os cursos de torno cerámico e de pezas cerámicas en mesa, respectivamente, que se celebrarán do 9 ao 13 de agosto. Sandra Betanzos, de Amorote Printing Workshop (Ames), encargarase de catro obradoiros de estampaxe que terán lugar en días diferentes. O 9 e o 13 de agosto celebrarase o de estampaxe de postais con selos, o 10 o de serigrafía téxtil, o 11 o de estampaxe creativa en téxtil e o 12 de agosto o de elaboración dun selo de follas autóctonas e estampaxe en papel.
Por outra banda, na sede da Fundación Uxío Novoneyra (Parada) terán lugar os obradoiros abertos impartidos por María José Martínez e José Antonio Carrera, de Peixesapop (Vigo), que se encargarán dos obradoiros Polos pés, entre o 9 e o 11 de agosto, e o de serigrafía e estampaxe, que se celebrará o 12 e o 13 de agosto.
No programa de actividades inclúense tamén 12 obradoiros de iniciación a diferentes oficios artesanais para os que están todas as prazas cubertas. En Froxán desenvolveranse dous cursos de cestería; na Escola Unitaria de Parada terán lugar os obradoiros de Iniciación á ourivería e os de macramé; no aloxamento rural A Carbiña están previstas seis actividades de formación, dúas por cada temática, degradados e sombreados sobre téxtil; bordado sobre fotografía; e bordado en la. Por último, na Fundación Uxío Novoneyra celebrarase un curso de elaboración de bancos de madeira cuxas pezas pasarán a formar parte do mobiliario da Fundación Uxío Novoneyra.
