A Festa do Peregrino que organiza o Concello de Triacastela chega á súa cuarta edición. Unha celebración que busca homenaxear a todas e todos os camiñantes que pasan pola vila percorrendo o Camiño Francés ao tempo que pon unha data festiva nesta poboación no mes de agosto.
Este ano será o 17 de agosto e na programación cómpre salientar os actos relixiosos e a música. Ás 11:00 h. haberá unha actividade de música de raíz na Praza do Concello que contará coa presenza de Xabier Blanco da Fundación Legar.
No que respecta aos actos relixiosos están programadas dúas misas, unha ás 13:00 h. na Capela de San Mamede e outra ás 19:00 h. na Igrexa Parroquial de Santiago de Triacastela. Esta última será unha ‘Misa Cantada’ que conta coa participación da Coral Sarricanta.
Xa pola noite, a partir das 21:00 h. haberá unha pancetada popular na Praza do Concello e a continuación verbena amenizada polo grupo Tania Veiras e a charanga sarriana Louband.
