Margaride de Lor é unha localidade quiroguesa que conserva as galerías dunha antiga mina de ouro empregada daquela polos romanos, un feito que levou á veciñanza a celebrar a Festa do Ouro.
A celebración, que chega este ano á súa XI edición e estivo dous anos sen facer por mor da pandemia, ten lugar na segunda quincena de agosto e conta cunha ambientación romana e castrexa moi enxebre ademais dun programa de carácter festivo e cultural moi interesante.
A veciñanza, a través da Asociación de Veciños e Veciñas de Margaride, fai posible que a súa aldea no conxunto e a zona das covas en particular, estean engalanadas con motivos romanos e que a xente que participa desta romaría histórica o pase en grande o día da celebración. Este ano será o sábado 19 de agosto e o tradicional xantar popular conta, segundo nos contaron da organización, con preto dun cento de persoas apuntadas.
PROGRAMA
As actividades comezan ás 11:30 h. cunha Misa en Latín e ás 12:00 h. farase a visita ás adegas co acompañamento do grupo tradicional O Recanto.
Ás 14:30 h. terá lugar xa o xantar popular no campañento castrexo-romano que os propios veciños e veciñas montan días antes para a ocasión. Haberá polbo e churrasco e outras viandas para os que se anotaran previamente.
Xa pola tarde, a partires das 18:00 h. xogos entre castrexos e romanos para todas as idades: chave, carreira de sacos, busca do ouro…
Chegando á noitiña, ás 21:00 h. aperitivo festeiro con DJ Kola e ás 22:00 h. cea popular na que a veciñanza convida a empanada, chourizos e roscón.
Como remate, ás 23:00 h. haberá escenificación teatral de rituais celtas coa participación de xente do Teatro de Salcedo. Participará un Druída, bautizaranse dous pequenos e farase o ‘rito da boa sorte’ e unha Queimada. A partir das 00:00 h. verbena final.
