A Feira de Artesanía e Produtos da Zona que organiza o Concello de Triacastela chega á súa XI edición este sábado 23 de setembro.
A xornada comezará ás 11:00 h. coa apertura de postos de artesanía, hora na que tamén se fará a presentación do Centro de Interpretación ‘Ferrería da Ponte’ e un paseo guiado polo coñecido Guido Guía que sairá dende a Praza do Concello e dará a coñecer a ‘Triacastela Xacobea’.
A mostra de artesanía contempla tamén a posibilidade de gozar de obradoiros temáticos. Así, entre as 11:00 e as 15:00 h., haberá unha demostración de cestería na carpa diante do Concello; entre as 11:00 e as 19:00 h. haberá unha demostración do ferreiro Fritz na Ferrería da Ponte; e nese mesmo horario outro obradoiro de estampación a cargo de Amorote tamén na carpa.
Ás 12:15 h. procederase á sinatura do protocolo de irmandamento entre o Concello de Triacastela e a Freguesía de San Pedro de Rates; e ás 12:30 h. está programada a inauguración dunha exposición pictórica. Será na Fonte do Lunar e leva por título “Catro médicos pintores seguimos polo camiño”.
A xornada matinal rematará co pregón, ás 13:30 h., a cargo de Paulo Sá Machado, asesor para a Cultura da Junta de Freguesía de San Pedro de Rates, e coa chegada da concentración de motos organizada polo Motoclub Os Mouchos.
CANTOS DE TABERNA
A xornada rematará pola tarde-noite con ‘Cantos de Taberna’. Varios grupos de música tradicional percorrerán os locais de hostalería de Triacastela para crear un ambiente ideal de fin de festa.
