Os polos de Emprendemento e Apoio ao Emprego xeran actividade vencellada co territorio a través do emprendemento e da creación de emprego de calidade. Desde que iniciaron a súa actividade hai un ano, os polos de Lugo deron asesoramento e axuda para levar a cabo proxectos de emprendemento de 123 persoas, coas que se realizaron máis de 300 sesións de traballo. Entre as actividades máis representadas nos proxectos de emprendemento, atópanse a hostalería (26% do total), o comercio (10%), servizos (10%) e as actividades recreativas, de entretemento e artísticas (9%). As persoas  emprendedoras que recibiron apoio nos polos da provincia teñen no 54% dos casos entre os 35 e os 52 anos, e o 61% son mulleres.

En breve, Lugo contará cun 5º polo de emprendemento e apoio ao emprego en Sarria. A conselleira de Promoción do Emprego e Igualdade, Elena Rivo referiuse ao compromiso da Xunta coa consolidación e implantación empresarial nesta provincia de oportunidades, “Desde Sarria traballaremos tamén para dotar ás persoas que queren iniciar un negocio ou transformalo de todas as ferramentas e o asesoramento experto para que o leven a bo fin.”