No acto, estiveron presentes entre outras moitas autoridades, o Embaixador de Italia en España, Giuseppe Buccino Grimaldi (que é napolitano), e o actual XXIII Conde de Lemos e XIX Duque de Alba, D. Carlos Fitz-James Stuart y Martínez de Irujo, acompañado do seu fillo maior e próximo herdeiro, D. Fernando Fitz-James Stuart y Solís, XVII Duque de Huéscar, con quen o Alcalde aproveitou para departir sobre Monforte e a Ribeira Sacra, trasladándolle a invitación verbal que foi aceptada e que se formalizará proximamente.

Na intervención feita polo Duque de Alba durante a presentación do libro, este amosouse moi orgulloso de ostentar o título de Conde de Lemos, “xa que é un dos máis grandes e antigos da Casa de Alba”.

O concello de Monforte contribuíu na edición deste libro por ser “o VII Conde de Lemos, unha figura moi relevante dentro da historia monfortina, e que deixou unha profunda pegada en eidos tan importantes como a política, a sociedade ou a cultura.” O concello distribuirá exemplares da obra, que consta de dous volumes, na Biblioteca Municipal Poeta Lois Pereiro, así como nos diferentes centros educativos de educación primaria e secundaria de Monforte. “O resto de exemplares dos que dispón o concello serán entregados en visitas institucionais, debido a   que o VII Conde de Lemos é unha figura que debe ser dada a coñecer polo que significa dentro da historia de Monforte”, destacou o alcalde.

Encontro Duque de Alba, Manuela Sáez, José Tomé / Concello de Monforte