A asociación destaca que nos últimos anos fíxose patente o incremento na demanda de vivenda no municipio, “Por unha parte recibiuse un considerable número de inmigrantes que achegan familias enteiras coa intención de traballar e vivir no noso concello. Doutra parte, son moitas as parellas e mozos que buscan vivenda aquí e non a atopan, tendo que marcharse aos municipios veciños de Chantada e Monforte para conseguila.”

Considera a asociación veciñal que este éxodo está mermando aínda máis a poboación dun municipio que nos últimos catro anos perdeu máis de 500 habitantes.

Segundo a asociación, no Saviñao non existe unha oferta de vivenda que dea cuberto as necesidades actuais. Considera que a sitación agrávase coa caída poboacional, “que pon en risco a pervivencia do concello e fai urxente e imprescindible a inmediata actuación da administración local.”

Así reclaman a equipo de goberno e oposición que valoren de xeito serio e consensuado a creación inmediata de vivenda pública en resposta á demanda urxente da poboación, “que non se subsana coa oferta existente de vivenda en aluguer ou propiedade, que é insignificante.”