Segundo informa a Asociación Qui-Roma, organizadora do Qui-Medo, o evento de terror máis popular do sur de Lugo, e un dos que máis está medrando de Galicia, suma xa máis dun milleiro de inscritos e inscritas (uns 1.100 inscrit@s cando se redactou esta nova).
A IV edición deste terrorífico evento terá lugar o vindeiro sábado 28 de outubro cun recorrido que levará aos máis atrevidos e valentes por 8 casas temáticas nas que o medo está garantido. Esas oito casas nas que se lle meterá medo aos asistentes foron bautizadas cos seguintes nomes: A casa Sau, o Circo Malvado, A Peste, Stranger Things, Chucky, A Momia, Biblioteca Poseída e a Carcel Zombi.
A organización lembra que as visitas ás casas recoméndanse para maiores de 13 anos, e os menores desa idade deberán de ir acompañados.
PAVILLÓN MUNICIPAL, O PUNTO DE ENCONTRO
O pavillón municipal de Quiroga será o centro neurálxico do Qui-Medo. Abrirá a partir das sete da tarde para que o lider de cada grupo se achegue a recoller as pulseiras de entrada nas casas e tamén para o inicio do Quimedofest Infantil, unha festa aberta a todos os nenos e nenas sen necesidade de inscrición.
O mesmo espazo acollerá o Quimedofest, festa xa pensada para os maiores, que poñerá remate ao Qui-Medo tras a visita ás casas, percorrido que se realizará entre as 9 e media da noite e as doce e media. Dará comezo ás 00.30 h. e contará cun concerto de rock a cargo da banda ourensá En Mala Hora e coa Discomóbil do DJ quirogués Míchel.
Os organizadores do Qui-Medo cren que esta é a mellor edición das realizadas ata o de agora e destacan a colaboración dos voluntarios –máis dun cento–, do Concello de Quiroga, de Protección Civil e tamén dos propietarios das vivendas que as deixan para realizar este evento. En canto ao número de inscritos e inscritas, a intención é pechar en 1.200 a asistencia definitiva ao evento.
