A cidade de Monforte acolleu entre o xoves 26 e este venres 27 de outubro a 63ª Asemblea da Red de Juderías de España. En palabras do alcalde, acudiron á cita “o 70% das cidades que forman parte desta Rede, o cal é un éxito, pois foi un reto levar a cabo esta importante xuntanza tras a celebración das pasadas eleccións municipais, e supón unha ocasión moi especial porque é a primeira vez que a nosa cidade ostenta a presidencia, con importantes retos por diante”.
Á xuntanza acudiron alcaldes, alcaldesas, concelleiros e concelleiras, así como técnicos e persoal especializado no eido do turismo e da cultura. As cidades participantes, ademais da anfitriona Monforte, foron: Barcelona, Calahorra, Córdoba, Estella, Hervás, Jaén, Lorca, Lucena, Plasencia, Ribadavia, Sagunto, Segovia e Tui.
DESENVOLVEMENTO DA ASEMBLEA
Boa parte da Asemblea foi dedicada a repasar os proxectos troncais desta asociación que afectan a aspectos tan importantes da xestión municipal como o son o turismo, a cultura e a educación, dado que moitos dos membros actuais son novos, logo das últimas eleccións municipais celebradas en maio. Tamén foi aprobado o orzamento xeral, que alcanza os 350.000€.
Un dos retos de futuro que se puxo enriba da mesa foi levar a cabo unha reunión técnica “que acabe de dar formato ós requisitos necesarios para entrar na Red de Juderías de España, pois hai moitos concellos interesados en formar parte desta Red, e ese ingreso debe producirse dun xeito ordenado”, indicou o Alcalde anfitrión.
José Tomé rematou apelando ó “espírito de cohesión da asociación” e insistiu na “defensa dos valores que transmitimos desde a Rede, porque nos beneficia a todos traballar desde a unión e marcándonos metas comúns”.
REFERENCIAS AO CONFLICTO BÉLICO
José Tomé, Alcalde monfortino, condenou enerxicamente os atentados terroristas perpetrados en Israel o 7 de outubro e fixo “un chamamento os contendentes para que sempre prevaleza o respecto a poboación civil e ós dereitos humanos”.
Nese senso, desexou que “este conflito bélico chegue ó seu fin o antes posible e que se respecten as normas de orde internacional e de respecto á poboación civil de ambos lados da fronteira”.
